Hits: 441

EDITORIALY

Ry havana malala!

Ho aminao anie ny fiadanan’ny Tompo Jesoa

“Miverena amin’ny Tompo Andriamanitrao”

Lohahevitra vaovao indray no hitaomana antsika Fiangonana amin’ity volana martsa ity. Hiditra ny vanim-potoanan’ny Karemy rahateo isika izao ka ampirisihina mba handini-tena sy hanamasina ny fiainantsika.

Koa miantso antsika mba hiverina amin’ny Tompo ny lohahevitra eto.

• Izy Tompo Andriamanitra mihitsy no miangavy sy mitalaho ny hiverenantsika Aminy. .
• Mandray antsika Izy na mpanao meloka aza Isika dia miverena Aminy.
• Tsy tezitra na mibedy antsika Izy fa miverena Aminy fa ho raisiny am-pitiavana.
• Mibebaha ary aza omena lamosina intsony Izy fa miverena Aminy.
• Aoka ataontsika ho zava-dehibe ny fandihian-tena sy fieritreretana lalina ny làlanatsika koa mitodiha any Amin’ny Tompo amin’izay.
• …

Mirary soa ho antsika rehetra hamakivaky izao vanim-potoanan’ny Karemy izao ary dia handray Famonjena lehibe entin’ny Paska 2020.

“Miverena ianao, hoy ny Tompo; …; fa hamindra fo Aho, ka tsy hitahiry fahatezerana mandrakizay” Jer. 3: 11

Ho tanteraka amintsika tokoa anie izany

Ny Mpitandrina

Hits: 379

Faly misaotra an’Andriamanitra isika noho ity volana vaovao nomeny antsika amin’ity taona 2020 ity.

 “Mahatoky ny Teny vavolombelon’ny Tompo”

Izany indray no lohahevitra banjinintsika amin’ity volana febroary ity. Ireto misy hevitra vitsivitsy hifampizaràna amintsika ambaran’izany.

Mahatoky ny tenin’ny Tompo:

• Azo hametrahana fitokisana ny Tenin’ny Tompo.
• Tsy mandainga ny Tompo rehefa miteny.
• Azo hiateherana ny sitrapon’Andriamanitra.
• Izay rehetra tenenin’ny Tompo dia tanterahiny ary vitany avokoa.
• …

Ny Teny vavolombelon’ny Tompo dia:

• Miara-monina amintsika amin’ny fotoana sy izay misy antsika rehetra.
• Mahita ny ataontsika rehetra na tsara na ratsy.
• Miara-miasa amintsika izay mandray Azy hatrany.
• Mahalala sy mahafantatra ny manjo antsika na tsara na ratsy.
• Manampy antsika hamaha ny olana mianjady amintsika.
• …

Koa inoana fa hifikitra amin’ny Tenin’ny Tompo isika manomboka izao ary hiara-miaina Aminy hatrany mba ho azo antoka ny làlantsika amin’ity volana vaovao nomeny antsika ity.

“Fanilon’ny tongotro sy fanazavana ny làlako ny teninao Andriamanitra ô” Sal 119: 105.

Dia manonona ny fidanan’I Jesoa Kristy ho antsika rehetra.

Ny Mpitandrina

Hits: 508

“Indro ankehitriny no andro fankasitrahana;

indro, ankehitriny no andro famonjena” Isa. 49: 8

Ny Mpitandrina mivady sy ny FJKM Québec dia miarahaba antsika rehetra noho izao taona vaovao 2020 izao. Andriamanitra manan-karem-pahasoavana anie handrotsaka ny fitahiany sy ny fahasoavany ho antsika tsirairay sy isika isam-baravarana mandritr’izao taona izao.

 “Maneho ny tàna-maheriny ny Tompo Andriamanitra”

Izany no lohahevitra iainantsika Fiangonana amin’ity volana voalohany amin’taona ity. Ary ireto misy dikany izay ho toky ho antsika mandre izany:

• Te haneho amintsika ny Tompo Andriamanitra fa mbola misy Izy ary hijery ny fiainantsika tsirairay avy amin’ity taona ity.
• Te hanavotra antsika ny Tompo Andriamanitra manoloana ireo hery ratsy mitady hamotika sy handrava ny fiainantsika tsy hahatafitàna ity taona ity.
• Manantsotra ny tànany amintsika Izy te hitantana antsika mba handroso amim-pahatokiana isika hamakivaky izao taona izao. .

Koa matokia ary aza manahy na matahotra mizotra amin’ity taona 2020 ity satria mahery ny Tompo Andriamanitra hinoantsika. Lehibe Izy ary vonona ny haneho izany heriny izany eo amin’ny fiainantsika ka hanao zava-mahagaga sy mahatalanjona ho antsika.

Ho tanteraka amintsika anie ny tenin’ny Tompo hoe:

“… fa tànana mahery no nitondran’ny Tompo antsika” Eks. 13: 16

Ny Mpitandrina

Hits: 333

EDITORIALY

Ry havana malala!

Manonona ny fiadanan’ny Tompo Jesoa amintsika rehetra.

“Iaino ny fiadanan’ny Tompo”

Azo inoana fa isika rehetra dia samy mitady fiadanana avokoa; indrindra ka izany fiadanana avy amin’ny Tompo izany.

Koa ireto misy fampatsiahivana tiako omena anao anio:

• Efa nomen’ny Tompo antsika maimaim-poana sy feno ny fiadanany fony izy tety an-tany satria hoy Izy “Fiadanana no avelako ho anareo, ny fiadanako no omeko anareo. Aza malahelo na matahotra ny fonareo” Jao. 14: 27.
• Indrisy anefa! Tsy noraisintsika izany fidanana nomena antsika izany fa naleontsika ny fiadananan’izao tontolo izao. Hoy ny Apostoly manamarina izany “Fa ny fihevitry ny nofo dia fahafatesana; fa ny fihevitry ny Fanahy kosa fiainana sy fiadanana” Rom. 8: 6. Nifikitra tamin’izay an’ny nofo isika dia nanary ny tena fiadanana.
• Tsy mbola taraiky anefa isika satria mbola afaka mandray izany fiadanana izany nohon’ny famindram-pon’Andriamanitra. Ho ny toky ho antsika avy amin’ny Mpanao Salamo hoe “Jehovah hanome hery ny olony; Jehovah mbola hitahy ny olony amin’ny fiadanana” Sal. 29: 11.

fotoanan’ny “Advento” izao, ho antsika, izany hoe, fotoana hihomanana handraisana Ilay Andrianan’ny Fiadanana. Koa samy mandinin-tena isika mba ho tena ny fiadnan’ny Tompo no hiverina sy hiainantsika indray amin’ny taona vaovao, aorian’izao volana izao.

“Ary raha mbola nilaza izany izy, Jesoa dia nitsangana teo afovoany ka nanao taminy hoe: Fiadanana ho anareo” Lio. 24: 36.

Mirary ny fiadanan’ny Tompo ho amintsika rehetra.

Ny Mpitandrina

Hits: 283

EDITORIALY novambra

Ry havana malala!

Manonona ny fiadanan’ny Tompo Jesoa amintsika rehetra.

“Ho avy amin’ny heriny ny Tompo”

Mazava tsara ny tian’izany lohahevitra izany ho lazaina :

• Tsy maintsy hifanatrika amin’ny Tompo isika ary tsy ho afa-miala amin’izany.
• Hadinina amin’izay nataontsika rehetra isika amin’izany fiavian’ny Tompo izany koa mila mihomana isika.
• Tsy fotoana mampatahotra akory izany ho antsika mpino fa fotoana hanamafisantsika ny fandovàna ny famonjena mandrakizay ao amin’i Kristy Jesoa.

Noho izany dia mila mihomana isika rehetra hitsena ny Tompo am-pifaliana :

• Manàna fahasahiana hiatrika ny Tompo amin’ny fiverenany.
• Mahareta amin’ny asa fanompoana niantsoana antsika fa izany no sitrapon’Andriamanitra amintsika. Isan’ny hanadinana antsika ny fahavitantsika ny sitrapony na tsia amin’izany.
• Mijoroa amin’ny finoana ary miezaha miaina amin’izany fa tombontsoa ho antsika izany amin’ny fiavian’ny Tompo.
• Aza mihemotra na dia misy aza ny olana sy ny sarotra sedraintsika fa miroso amin’ny famonjena isika izay horaisintsika amin’ny fiavian’ny Tompo.

Raha tsara ny fihomanantsika, ka ho avy ny Tompo, na amin’ny ora fahafiry na amin’ny fotoana aiza, dia tsy hana-tahotra fa hahatoky  kosa fa ho isan’ny mpandresy isika.

Ho amintsika rehetra anie ity Soratra Masina ity « Ho avy faingana Aho;  tano mafy izay anananao, mba tsy hisy haka ny satro-boninahitrao » Apo. 3 : 11.

Ny Mpitandrina

Hits: 422

Ry havana malala!

Manonona ny fiadanan’ny Tompo Jesoa amintsika rehetra.

“Maniria ny haminany”

Izany indray no lohahevitra vaovao iainantsika Fiangonana amin’ity volana oktobra ity. Tsy zava-baovao ho an’ny mpino akory ny fitaomana azy haminany fa efa hatrany am-boalohany no niaina izany izy ireo. Ao amin’ny Baiboly rahateo dia mibahan-toerana ao ny resaka faminaniana sy mpaminany.

Ireto no tsara marihina amin’izany:

• Ny teny hoe “faminaniana” dia midika hoe “vavan’Andriamanitra miteny”. Izany hoe, mindrana ny vavan’ny mpaminany Andriamanitra hanaparitaka ny Teniny sy ny Sitrapony. Mpizara ny Tenin’Andriamanitra sy ny sitrapony ny atao hoe Mpaminany.
• Noho izany ny faminaniana tiana ho lazaina eto dia tsy hoe famantarana ny ho avy toy ny mahazatra antsika fa “fanehoana ny sitrapon’Andriamanitra manoloana ny trangan-javatra lasa, na efa nisy, dinihina amin’izay miseho ankehitriny ka hahafantarana ny làlan’kaleha amin’ny ho avy”.
• Koa aoka tsy ho mpaminany sandoka isika (Jeremia 14: 14, 15): hilaza izay heverintsika sy eritreretintsika ihany, na haminany hitadiavana tombontsoa ho an’ny tenantsika fotsiny, na maniry ny halaza sy hanangana Fiangonana ka mamorona faminaniana ho arahin’ny olona, na mamoron-dainga hanasoasoa olona hisarihana azy na hitsaràna azy ho mpanao meloka ka hampahoriana azy, (Ezekiela 21: 34)
• Ny faminaniana marina andrasan’ny Tompo amintsika dia: Mizara ny sitrapon’ny Tompo Jesoa hapandroso ny fiainan’ny rehetra sy ny Fiangonana izay hiantefany (I Kor 14: 4); Tsy ho mpaminany mitondra henatra sy mpamitaka na mpanararaotra ny hafa (Zakaria 13: 4); Mpaminany milaza ny zava-misy marina fa tsy hanarontsarona sy handamindamina izany (Ezekiela 13: 9).

Koa “Maniria ny haminany isika rehetra ka ho mpitory sy mpizara ny Tenin’Andriamanitra izay niantso sy naniraka antsika.

Mirary soa ho antsika rehetra amin’izao volana oktobra izao ary ho tanteraka amintsika ny voalzan’ny I Sam 10: 6 hoe “Ary hilatsaka aminao ny Fanahin’I Jehovah, ka hiara-maminany Aminy ianao, dia ho voaova ho olom-baovao”.

Ny Mpitandrina.

Hits: 372

EDITORIALY septambra 2019

Ry havana malala!

Manonona ny fiadanan’ny Tompo Jesoa amintsika rehetra.

“Manompoa ny Tompo amin’ny fahamasinana”

“… mba hatolory ankehitriny toy izany koa ny momba ny tenanareo ho mpanompon’ny fahamarinana hahatanteraka ny fahamasinana” Rom. 6: 13.

Ny voambolana hoe “masina” dia mifamatotra amin’ny hoe “hatokana”. Raha masina Andriamanitra dia tena mitokana tsy mifangaro ary tsy hafangaro amin-javatra hafa Izy satria masina. Toy izany ihany koa, ny mpivady nandray ny tsodrano fanamasinana ny fanambadiany, teo anatrehan’Andriamanitra, dia miezaka manokana izany fanambadiany izany ho azy roa irery sy ny zanany, fa tsy hafangarony amin’ny hafa satria masina ihany koa ny fanambadiana.

Koa raha taomina hanompo amin’ny fahamasinana isika dia entanina mba hanokana ny fanompoantsika tsy hifangaroharo amin-javatra hafa. Ary satria ny zavatra hatokana dia heverina ho manan-danja tokoa dia:

• Aoka tsy haroharohina amin’ny hafa ny fanompoantsika ny Tompo fa tena hitokana mihintsy.
• Ataontsika ho zava-dehibe ny fanompoana Azy ka ho mahasaro-piaro sy hitandrinaizany isika mba ho sarobidy tokoa izany eo imasontsika.
• Mba hanao ny tsara hatrany no tanjon’ny fanompoantsika Azy ka hitondra vokatra tsara isika amin’ny atao rehetra.
• Ho feno ny fahamasinana avokoa ny momba antsika rehetra “fo, saina ary fanahy” mba tsy handiso fanantenana ny Tompo ny niantso antsika ho mpanompony. Ny asa masina mantsy dia mitaky fahamasinana ho an’izay manatanteraka azy ihany koa araka ny voalaza hoe “Ho masina ianareo, satria masina Aho” I Pet. 1: 16.

Koa inoana fa omen’ny Tompo antsika rehetra indray ny fanahiny, amin’ity volana septambra 2019 ity, mba hanamasinantsika ny tenantsika sy ny fanompoantsika rehetra.

Ho tanteraka amintsika rehetra anie ity tenin’Andriamanitra ity: “Atolory ny momba ny tenanareo ho mpanompon’ny fahamarinana hahatanteraka ny fahamasinana” Rom 6: 19.

Mifampivavaka isika mba ho volana hanehoantsika fahamasinana ho amin’ny asa fanompoana ny Tompo anie ity volana nomeny antsika ity.

Ny Mpitandrina

Hits: 359

EDITORIALY  

Manonona ny fiadanan’ny Tompo Jesoa amintsika rehetra.

“Miadia ny ady tsaran’ny finoana”

Tsy ny vatana, na ny fiainana, na ny saina ihany no miady ho antsika fa misy ady ihany koa ny “Finoana”. Saingy ny tombony ho antsika dia tsy voatery ho ratsy hatrany akory ny ady ho an’ny finoana fa tenaazo atao tsara.

Hevitra roa no tian’i Apostoly Paoly ho lazaina ao amin’ny I Timoty 6: 12 mahakasika izany dia izao :

• Anjarantsika kristiana no miady mafy mba hovotazona ny finoana izay efa azontsika.
• Tokony hahay manavaka ny ratsy sy ny tsara isika mba hitazonana izany finoanantsika an’I Jesoa Kristy Tompo izany.

Tsy zava-mora akory ny fanarahan-diha ny Tompo, saingy tena azo iainana sy tanterahina tsara izany, koa:

• Raha hiady ihany dia ataovy izay hananao finoana mahery sy matanjaka
• Raha tsapantsika fa efa mino isika dia ataovy izay hiazonana izany tsy ho very
• Tsy maintsy miady isika amin’ny fijoroana vavolombelona ataontsika ka hanavao isan’andro, eo imason’izao tontolo izao ny finoantsika.

Koa ao anatin’izao volana vaovao izao dia andeha ataontsika fenitra ity Tenin’Andriamanitra ity “Miadia ny ady tsaran’ny finoana, hazony ny fiainana mandrakizay; fa ho amin’izany no niantsoana anao koa sy nanaovana ilay fanekena tsara teo imason’ny vavolombelona maro” I Tim. 6: 12.

Mirary soa ho antsika rehetra ary dia mifampivavaha hatrany fa tsy moramora akory ny miady ny ady tsaran’ny finoana, nefa azontsika atao tsara satria manampy antsika  Ilay Tompon’ny finoantsika.

Ny Mpitandrina

Hits: 327

EDITORIALY

Ry havana malala!

Manonona ny fiadanan’ny Tompo Jesoa amintsika rehetra.

“Manatrika ny mino ny Tompo”

Toky sy fanantenana no entin’izany lohahevitra banjinin’ny Fiangonanatsika izany, amin’izao volana vaovao izao.

Manoloana ny fahasahiranana sy ny olana maro mianjady dia sahiran-tsaina isika ka mieiritreritra fa tsy hitan’Andriamanitra intsony ny manjo antsika. Ity lohahevitra ity anefa dia manome toky ho antsika fa tena MANATRIKA antsika I Jesoa ary eo anilantsika mandrakariva Izy.

• Miara-miaina amintsika Izy ka mahita ny fahotantsika, ny fahalementsika ary ny hafanan’ny finoantsika ihany koa.
• Mahita ny fahoriantsika sy ny adin-tsaina mianjady amintsika isan’andro Izy k ate hanampy antsika.
• Mitantana antsika Izy ary manoro sy mitari-dàlana sao dia sanatria mania isika.
• Manarina antsika Izy raha sendra ka solafaka isika ka indry! midaraboka amin’ny tany.
• Mananatra sy manitsy antsika Izy raha variana amin’ny rendrarendra sy ny fakam-panahy isika ka manavotra sy mamonjy antsika.
• Mihaino ny vavaka sy ny fangatahantsika Izy ary dia hamaly izany avy hatrany, araka ny sitrapony.
• Miara-paly amintsika Izy rehefa mijoro vavolombelona ny Aminy isika.

Noho izany dia matokia fa eo anilantsika sy manatrika antsika ny Tompo ary tsy mamela antsika ho irery. Hoy ny teniny: “Fa na aiza na aiza no iangonan’ny roa na telo amin’ny anarako, dia ao afovoany Aho” Mat. 18:20.

Ho tanterahiny amintsika tokoa anie izany.

Mampahery antsika rehetra ary samia mifampivavaka hatrany.

Ny Mpitandrina

Hits: 404

EDITORIALY

Ry havana malala!

Manonona ny fiadanan’ny Tompo Jesoa amintsika rehetra

 “Metèza ho fenoina ny Fanahy Masina”

Ao anatin’ity volana jona ity, araka ny taom-piangonana, dia hankalaza sy hahatsiaro ny nidinan’ny Fanahy Masina indray isika, dia ny Pentekosta izany. Izany rahateo no anton’ny lohahevitra banjinintsika, voalaza etsy ambony, ka hifampizarantsika sy hibaiko antsika amin’ireo isan-tokom-panompoana miandry antsika.

Miangavy antsika ny Tompo araka izany satria tombontsoa maro no entin’ny Fanahiny Masina ho antsika raha mety handray izany isika:

• Mampiombona antsika ny Fanahy Masina na dia manana ny maha-samy hafa antsika aza isika (Asa 2: 4).
• Hery mandrisika antsika hitory ny Filazantsara ny Fanahy Masina (Asa 4: 31).
• Manampy antsika amin’ny fifanampiana sy ny fifandaminana ny Fanahy Masina (Asa 6: 3).
• Manome toky antsika ho afaka hiatrika ny olana sy ny fahoriana ny Fanahy Masina (Asa 7:55).
• Manitsy antsika amin’izay fahadisoana sy miaro antsika amin’ny fakam-panahy ny Fanahy Masina (Asa 9: 17).
• Mitaona antsika ho amin’ny fanoloran-tena sy fampiroboroboana ny finoantsika ny Fanahy Masina (Asa 11: 24.
• Ny Fanahy Masina irery ihany no hahafahantsika mifanatrika mivantana amin’i Jesoa Kristy (Asa 13:9).

Koa inoana fa samy handray sy hanao ho zava-dehibe izany Fanahy Masin’ny Tompo izany isika satria tombontsoa ho antsika izany.

Hoy ny Soratra Masina “Raha velon’ny Fanahy isika, dia aoka handeha araka ny Fanahy” Gal. 2: 25.

Mba ho isan’izay mpino feno ny Fanahin’ny Tompo anie isika. Mahereza indrindra!

Ny Mpitandrina